掌握科工行動版

馬蒂，遮是大頭博士(phok-sū)，工作(kang-tsok)代號BH9547(kiú-ngóo-sù-tshit)，請你查(tsa)詢今仔日愛修理ê古物。馬蒂？電腦馬蒂！敢有聽--ê？eh，哪遐費氣，我是對（tuì）「時空(sî-khong)工程系」出業ê博士博，明明會當共研究院做閣較厲害ê時光(kong)機，想袂到竟然予人派來修理這台老古董「山海一號」（san-hái-it-hō），我迸矣(Guá piàng--ah)，這台漚古(àu-kóo)　ê時光機meh-tah，年代指針攏袂行ah，哼，才毋是因為我頂改無細膩共珍珠奶茶捙倒teh機械，這台時光機早就愛退休啊！

（咳）好lah，我承認，是因為珍珠落佇時光機meh-tah，「山海一號」才會歹去，這台時光機會tuì無仝時空ê發明家遐偷提一寡毋知佗位來ê古物，按呢代誌就大條ah，咱愛趕緊kā 古物修理予好，靠山海一號送轉去正確ê年代，還予發明家。若無，咱人類科技發展歷史就真正去了了ah！

哎，真正是掠蟲來尻川擽，「山海一號」今仔日提轉來ê古物曷ia̍h傷過濟，hēnn……，詳細共看，遮--ê機械佮模型（bôo-hîng）敢若攏tsham印刷有關係呢，而且是一種特殊ê文字印刷技術，號做「活版印刷（ua̍h-pán)」，電腦馬蒂共我講，這款技術通常使用柴刻字、金屬抑是黏塗字母徙位來印刷，取代（tshú-tāi）人工（jîn-kang）抄寫（tshau-siá）kah 柴雕印刷。彼當陣就有人kah我平巧，發明印刷術，印刷效率加真緊。

咱一步一步來看活版印刷ê過程，頭起先，用銅模（bôo）鑄造（tsù-tsō）鉛字（iân-jī），揀一字想欲做字母ê銅模，下落鑄字機，共鉛角熁予鎔去，倒入去銅模內底鑄做鉛字。第二步是抾字，看印刷ê內容tī字盤揣欲愛ê鉛字。第三步，排長短，大細字排予齊，共鉛角設佇咧縫，弓予好勢。第四步，拍樣，較免印毋著去，會先共格仔提去拍樣機，若有毋著隨改隨試印，拍樣好勢才閣印刷，裁過佮線裝訂（tìng），按呢就完成ah！

Á，原來活版印刷遐爾仔複雜，莫怪今仔日愛修理ê古物遐濟款，按呢愛趕緊共遮修理予好勢，較緊提la̋i還予發明家。

我佇這个櫥仔搜著銅模矣，足讚呢！馬蒂，你頭拄仔講鑄鉛字頭一步ê銅模，是塌落去ê字母，有成印仔陰刻，毋過是銅金屬做ê，料身柔軟配合鑄字機鑄做鉛字ê字母。

喂，馬蒂，緊提雷射來復原這个銅模，摁，袂䆀，字母高尚有雅氣，真有讀冊人ê範，呃，字劃敢若是書法ê款式，這敢是「風行銅模」？我會記「風行銅模」是台灣這馬ê正楷（tsiànn-khái）字母，是一間號做「風行鑄字社」的工場做—ê，電腦馬蒂講，1949年初（tshue）「風行鑄字社」負責人許鴻璋（Khóo Hông-tsiong）先生共伊鑄字ê事業移轉來台灣，tuì廈門來ê「風行上海正楷（tsiànn-khái）字」真媠款，是1949年官方單位指定使用ê字母，抑是蔣介石指定排印駐外（guā）大使（tāi-sài）聘書（phìng-su）ê字母。

好啦，修理好ah，欲共風行銅模囥轉去櫥仔底。

我提儀器掃描這字面捅出來ê鉛角，發現五金成份有「iân」、「àn-tsih」kah「siah」，毋過鉛占上濟，莫怪號做「鉛字」。「鉛字」嘛有人講是「活字」，字面四四角角，有橫逝有直逝，雄雄一下看亂七八糟，毋過無仝鑄字廠，鉛字ê懸度、大細、字面ê整齊度攏是統一用鑄字機鑄做，頭拄仔儀器掃描有檢查著，鉛字ê腹肚邊無仝樣ê刻劃就是鑄字廠做ê記號。馬蒂，過來檢查壁角彼台鑄字機，我已經整理好ah，確定kah大眾排版ê標準、印刷需求有相仝ah！

Ah，害ah，無細膩去挵著格仔，若是欲共復原愛開真濟時間……喂？哪會無落落來？好佳哉，格仔有設計做趨趨，真巧，敢是驚有人嘛無細膩去挵著ê款？哈哈！

我來看覓，馬蒂，請你投影彼个年代印工teh做排版工課ê影片，Ha̋nn，是遐爾仔厚工，干焦看印工tuì格仔揣欲排版，一字一字á抾欲愛ê內容，我就直欲睏去ah。馬蒂，請你加速放影，tsa̍p，猶閣咧抾？毋是呢，這馬teh「排版桌」頂懸共字稿照順序排予好，頭前尾仔空白無字ê所在愛設空白khàng-pe̍h鉛角，字若欲隔巡，用kheh一巡一巡落去格，尾仔師傅會佇四箍圍囥柴枋，用棉紗線縛予絚拍活結固定，然後囥佇下面存版盤kah盤架，敢是按呢就完成ah？

原來如貓，干焦是排長短就遐爾仔費神，毋才有遐濟「號外」，佇彼个資訊傳播真僫ê年代，代誌發生了後，做活版印刷愛經過真濟人工lâng-kang），欲佇報紙臨時追加內容luē-iông是誠tsiânn困難的代誌。

頭拄仔開傷濟時間teh看印工排版ê放送，這馬無欲閣看，來試看覓按怎扞拍樣機。馬蒂，這台拍樣機敢是鉛字版專用？實在真趣味，想袂到閣會當手動操作，共拄才排版ê鉛字版囥leh遮，印紙樣，呃，敢若減一字去，閣試看leh，無要緊，聽人講紙樣攏會對稿三四擺，見本攏無問題才會印刷。

齁，總算是攏無問題ah，機器嘛無啥物狀況。真好，來去看上尾一站ê印刷。

真濟機器呢，遮有兩種早期較捷看著ê手動活版印刷機，我先來檢查頭一種圓盤印刷機的印刷狀況，摁，色彩鮮沢，若發現印毋著去，隨印隨改，適合少量sài-sù細ê，親像me51 tsi11、卡片。

第二種輪轉（lûn-tsuán）印刷機，分做對碖仔頂懸下紙ê高台式kah下面lún ê平台式，台灣上濟ê是平台式機型，這種機械ê原理是利用碖仔佇膨版平面碖，碖仔kah版面會tsua̋nn直直接觸，壓力平均（pîng-kin）,印刷效率好。無毋著，這就是印報紙ê機型，只要是一般膨版平面，親像冊、雜誌攏會使印。

欸？這台活版印刷機，山海一號竟然閣紮「Hopkinson & Cope Albion印刷機」轉來，彼會使講是1860年代金屬全手動印刷時代ê產品，是全手動印刷機！

馬蒂，請你查詢「15世紀，古騰thîng堡pó，木製印刷機」ê資料結果，嘿，看起來這台這台機器ê祖先「木製印刷機」，又閣叫「捲螺kńg-lê印刷機」，佇15世紀改良了後有濟濟使用，然後一直修改，到16世紀，為著增加使用年限，將捲螺仔ê零件材質換做鐵，增加硩紙ê格仔，用羊皮紙包起來，墨水較袂tòo去別位，為著改善鉛字懸低坎，共布繃佇紙篋仔，tsū佇紙kah印版中間。17世紀加壓杆加較重，予壓盤自動夯giâ起來，號做荷蘭印刷機，後來佇1630年、1640年傳去英美。誠實工藝機器不管是當時hőng發明出來，攏一直teh進化。

閣等下，山海一號！這台機器真緊就修理好，送轉去發明家遐。

馬蒂，你敢知影歐洲(Au-tsiu)核子（hu̍t-tsú）物理（bu̍t-lí）研究中心，tī 1980年代起ê地下磅空，彼時陣科學家利用128个加速艙予(hōo)電子kah正電子加速kah相磅，正電子kah負電子敢若teh走相逐然後lòng做伙。若是用足緊ê速度共(kā)粒子(lia̍p-tsú)挵予碎糊糊，都會出現閣較細粒的粒子，這款基本粒子號做quark。這ê計畫就是「高能正負電子對磅機LEP」計畫。
後來，研究中心koh開始一个新ê計畫，叫「大型強子對磅機LHC」。拆除原本彼台對磅機，保留磅空kah加速艙，因為有丁肇中（Ting tiāu-tiong）先生鬥相共，咱有通保留這台銅製加速艙。
修理這你就ài較頂真leh，若是這台走去其他ê年代，是毋知會發生啥物代誌。

你看！馬蒂（Má-tì）！咱發現tio̍h啥？這是公尺副原器（Kong-tshioh hù guânkhì）！好佳哉，無去hōo時空亂流（luān-liû）破壞。啥？你teh講啥？這干焦是一支普通ê尺niā-niā ？Ueh--! Ueh--！馬蒂！敢是亂流hōo你網路（bāng-lōo）運轉速度變較慢？詳細看leh，這是300年前法國人解決長度標準困擾ê重要寶物。
Tī西元1795年，法國科學院ê天才先輩（sia̋n-pái），kā 北極（pak-ki̍k）到赤道（tshiah-tō）這段距離分做一千萬份，一份就是一公尺。為著欲hōo所有ê人了解一公尺生做啥款，in就用「白金」做一支尺beh hōo全世界做標準。後來，為tio̍h beh hōo 長度koh khah 精確。（tsing-khak），in kā 這支尺 原來ê 材料換做「白金」kah「銥（i）」ê合金，較bē因為溫度變化長度改變！材料換新了後會當講是全面升級（sing-kip）
ah！馬蒂！馬蒂！你敢知影？彼當時（tong-sî）是世界大國ê法國，kā這个公尺副原器扣（khok）做31支分hōo其他國家。日本政府提著一支，in轉來了後koh根據這个標準koh再扣（khok）三支，其中一支囥teh台灣，當做台灣地區ê長度標準。
好矣！馬蒂！你慢鈍ê網路速度應該ài運轉ah！這馬，咱ê任務（jīm-bū）就是kā這支tī台灣ê公尺副原器修理好勢，送伊轉去正確ê時間。無，世界ê長度標準就beh大亂（tāi-luān）矣。

馬蒂！Kā我磅pōng看māi體重偌重，經過亂流了後，我敢若有較瘦(sán)。「tih-tih-tih！體重磅好矣！154.32！」啥物？單位敢是公斤？這哪有可能？馬蒂！
啊！我知矣！你看這个公斤副原器（Kong-kin hù guân khì）！一定是因為伊走毋著時代，現此時重量標準毋才（m̄-tsiah）無仝款。這个公斤副原器kah頭拄仔彼个公尺副原器是仝時期出現ê，lóng是因為法國政府提出「公制（kong-tsè）制度」來製造。Tī西元1795彼年，in kā公尺副原器當做標準，kā一个長、闊、懸lóng是10公分、4度C ê 純水ê重量訂（tìng）做1公斤。後來就親像拄才講--ê，西元1872年，法國政府mā kā材料換做，仝款「白金」kah「銥（i）」ê合金，較bē因為溫度變化重量改變！in khok 40个hōo全世界。
這馬這个就是彼當時日本送來台灣ê原器ê複製品。馬蒂，咱做伙kā修理好勢，送轉去正確ê年代！按呢就通知影我真實的體重矣！

經過時空亂流了後，lóng tih beh毋知家己tī佗一个時代ah。這是啥hannh？哇！馬蒂！咱揣tio̍h天文子午儀ah！按呢就會當知影咱tī tueh ah！天文子午儀是20世紀初世界科技歷史上，上有代表性ê天文測量（tshik-liōng）儀器。伊是測量恆星hîng-sing通過上接近天頂ê時刻，才來比對pí-tuì天文子午儀所在地sóo-tsāi-tē ê時間。也因為世界觸所在ê時間kah in 經度（king-tōo）有關係，所以子午儀有測定（tshik-tīng）地理經度ê功能。
咱這馬看tio̍h ê 這台G. Prin Paris子午儀是西元1920年法國Gautier公司生產ê。捌綴國民政府執行軍方kun-hong 大地tāi-tē 天文測量任務。後來才送去「中正理工學院測量系」伊比咱去過ê國家koh較濟，這台也是全國唯一。
馬蒂，修理這台子ngóo儀ê時一定ài 細膩，按怎早前ê人才袂舞毋著時間kah空間。

馬蒂，你敢知影觀測太陽烏子(oo-tsú)有兩種方法，是直視法kah投射法，這馬你看著ê這个設備，是西元1967年交通部電波研究所tī桃園設ê太陽烏子(oo-tsú)觀測設備。
馬蒂，你來kā我教講beh 按怎使用這个設備，我有小可仔袂記得。第一步，需要tī千里鏡ê目鏡頂懸tàu一塊投射板，第二步，觀察太陽ê影相tī這塊板仔ê投射，第三步，觀察太陽ê表面出現ê烏子(oo-tsú)數量kah範圍。按呢lán就通了解太陽有啥物款ê活動，這寡活動對地球電離層tiān-lī-tsân有濟濟影響，尤其kah咱使用網路、uán距離kī-lī通訊真有關係。
馬蒂，這个觀測設備實在足厲害，這馬，咱ê任務就是修理好這个設備，繼續來研究太陽ê神祕sîn-pì。

馬蒂！你看！是小教授1號！啥物？你竟然毋捌聽過？小教授1號台灣第一台8位元( uī-guân ) ê 電腦，彼當陣毋但tī 國內真奢颺( tshia-iānn )，就連tī美國、日本展覽mā是人人呵咾，會當講小教授1號是台灣電腦ê祖先輩。
馬蒂！你ê資料庫內底敢有1980年代全球lóng teh 痟( siáu ) ê apple2？彼當陣連仿ê mā 賣kah 美金300-400箍，差不多是台票1萬箍，莫想講1萬箍俗俗ah無算貴，對彼時陣來講，這个價數是普通家庭幾若年ê粒積( lia̍p-tsik )。但是，彼陣台灣ê宏kî公司提代理ê Zilog公司in ê 半導體( puàn-tō-thé )零件，揣tio̍h製造koh較輕較po̍h ê 電腦ê方式。
有一工，in就宣佈講in出一款新ê產品「小教授1號」。干焦70箍美金，kah 彼當陣其他上無ài 300至400 ê電腦來比，是真正俗kah袂講tit。所以講，馬蒂阿！緊更新你ê資料庫，咱beh hōo 台灣電腦ê祖先輩「小教授1號」轉去伊的年代風神一下！

馬蒂，咱用頭拄仔ê天秤來磅這寡磅子（pōng-tsí）！毋通看遮普通普通，in是tuì日本時代到今kàu-tann，是彼當陣提來檢定民間市場用ê磅子ê標準單位。 彼時，逐家ài kā beh檢定ê磅子囥tī天秤一爿，另外一爿囥重量標準器。就親像是
teh耍吭翹板（khōng-khiàu-pang)，看天秤二爿敢有平懸，來確定（khak-tīn）民間ê磅子敢有符合重量標準。
馬蒂，你鬥揣看科技寶庫內底有幾種重量單位ê磅子。公制、英制、台制，抑koh有日制單位。喔！原來咱收囥四種重量單位ê磅子，範圍tuì重ê到輕ê，啥物
lóng有neh。馬蒂，咱這馬來修理磅子，hōo磅子kah天秤做伙轉去in ê年代！

馬蒂！你來看這个神奇ê四角篋(kheh)仔，伊叫做米升(bí-tsin)，是「第一檢定用四角量器」，毋好看伊生做敢若做雞卵糕á ê 量杯，伊是提來檢定米、粟仔、種子這款物件ê體積！呃？這馬敢毋是攏照秤重ê？為啥物無欲閣繼續用米升來量米咧？
彼是因為進前有人teh量米抑是種子ê時陣，偷偷仔做跤手，事實上無量出來ê遐濟。
你想看覓，米升(bí-tsin)若先kā貯予tīn，閣kā tǹg-tǹg 予實(tsa̍t)，是毋是就無本底看起來遐濟，所以後來就改用秤重的較無爭議，這就是為啥物咱去買米（tia̍h-bí），包裝頂懸是寫「公斤」毋是「公升(kong-tsin)」。
這組量器有6个，上大ê拄好貯一升，上細ê干焦5觳（khok）。馬蒂，咱趕緊kā修理好送轉去日本時代，猶teh用量器ê年代。

馬蒂，替我掃描（sàu-biâu）這个天秤（thian-pîng）！毋好 看伊無，感覺伊輸hōo現代ê電子磅仔，伊tī彼當時是非常精密（tsing-bi̍t）ê儀器（gî-khì）喔！
Tī日本時代，這个天秤就是臺灣總督府專賣局（tsóng-tok-hú tsuan-bē-kio̍k）提來檢定（kiám-tīng）市場ê磅子上重要ê儀器。這個天秤上重會當磅到30公斤，精密度（tsing-bi̍t-tōo）是50毫克（hô-khik）呢！所以，馬蒂，掠準kā你囥起去，伊mā會使精準測量（tshik-liōng）！二戰了後，伊hőng送去臺灣省度量衡（tōo-liōng-hîng）檢驗所，tuì日本時代一直使用到西元1970年，會當講是台灣重要ê儀器之一啦！馬蒂，咱趕緊kā這个天秤修理hōo好，然後送伊轉去日本時代！

馬蒂！這是佗位？咱敢若來一个足神奇ê所在。Eh？竟然koh有鏡頭teh kā 咱翕（hip）。馬蒂，替我揣看覓科技（kho-ki）資料庫內底ê資料。喔!原來這是是公共電視第一代ê標準畫質數位電視設備，咱敢若咧見證歷史，看tio̍h這台設備就親像來到彼个猶teh轉型ê時代。
啊！我想tio̍h矣！西元2001彼年咱開始建設數位發射台huat-siā-tâi，數位電視節目mā開始矣！西元2004年，這是咱頭一改大聲講咱「正式行入數位元年」彼一年，毋過，其實ài等到西元2012年6月30日，台灣無線（bô-suànn）電視才全面轉換tsò數位化訊號sìn-hō，這个時陣咱才有正式行入「數位電視元年」。
啥？你講公視ê水果阿媽就是tī 遮開始全數位製作放送！這是我做囡仔會時陣真重要ê記持。馬蒂！咱ài趕緊來kā電視台ê數位電視設備修理好，hōo我的囡仔時代猶看會tioh數位ê水果阿媽！